ភ្នំពេញ៖ រដ្ឋលេខាធិការក្រសួងសុខាភិបាលលោកស្រី ឱ វណ្ណឌីន មើលឃើញថាការឆ្លងវីរុសបំប្លែងថ្មីប្រភេទអូមីក្រុងមានចំនួនកើនឡើងក្នុងរយៈពេលប៉ុន្មានថ្ងៃនេះ គឺបណ្ដាលមកពីការជួបជុំគ្នាច្រើនក្នុងអំឡុងពេលមានការបើកប្រទេសឡើងវិញ ជាពិសេសគឺនៅក្នុងពិធីបុណ្យទាននិងពិធីមង្គលការ។
លោកស្រីឱ វណ្ណឌីន លើកឡើងថាក្រោយពីមានការបើកប្រទេសឡើងវិញប្រជាពលរដ្ឋមានការជួបជុំគ្នាច្រើន ជាពិសេសគឺនៅក្នុងពិធីបុណ្យទាន ពិធីមង្គលការផ្សេងៗដែលមិនបានពាក់ម៉ាស់និងរក្សាគម្លាតគ្នាត្រឹមត្រូវតាមវិធានការសុខាភិបាលនោះឡើយ។
លោកស្រីមានប្រសាសន៍ថា៖ «យើងមើលឃើញហើយថា ពិធីបុណ្យ ពិធីរៀបអាពាហ៍ពិពាហ៍ក៏មានការប្រមូលផ្ដុំ ជាច្រើនកោះករផងដែរ។ យើងពាក់ម៉ាស់ហើយលាងដៃហើយ តែនៅពេលដែលយើងទទួលទានអាហារ យើងអង្គុយក្បែរៗគ្នាជិតៗគ្នាមួយតុ១០នាក់ ១២នាក់ ធម្មតាពេលពិសារគឺដោះម៉ាស់ តែកាលណាដោះម៉ាស់គឺចាប់ផ្ដើមជជែកគ្នា ហើយបើមានការជល់កែវទៀត វានឹងបង្កលទ្ធភាពនៃការចម្លងគឺលឿនណាស់»។
លោកស្រីបន្ថែមថា ទោះបីជាបច្ចុប្បន្នយើងកំពុងរៀនរស់នៅជាមួយជំងឺកូវីដ-១៩ក្ដី ក៏មិនមែនមានន័យថាយើងបំភ្លេចវីរុសនេះ និងរស់នៅដោយមិនបានការពារតាមវិធានការសុខាភិបាល ៣កុំ ៣ការពាររនោះដែរ។ លោកស្រីបន្តថា ចំពោះវិធានការ ៣កុំ ៣ការពារនេះ ប្រជាពលរដ្ឋហាក់មិនបានអនុវត្តឲ្យបានខ្ជាប់ខ្ជួននោះឡើយ ដោយមានប្រជាពលរដ្ឋភាគច្រើនអនុវត្តវិធានបីការពារបានល្អប្រសើរ តែមានការធ្វេសប្រហែសចំពោះវិធានការបីកុំ។
លោកស្រីសំណូមពរដល់បងប្អូនប្រជាពលរដ្ឋឲ្យចូលរួមការពារការឆ្លងវីរុសកូវីដ-១៩ ជាពិសេសគឺនាំគ្នាទៅទទួលការចាក់វ៉ាក់សាំងដូសមូលដ្ឋាន ជាពិសេសដូសជំរុញឲ្យបានគ្រប់ៗគ្នា ដើម្បីរក្សានិរន្តរភាពនៃការរស់នៅល្អប្រសើរ។
គួរឲ្យដឹងថាកាលពីថ្ងៃទី១៣ ខែកុម្ភៈ ឆ្នាំ២០២២ មានករណីឆ្លងវីរុសកូវីដ-១៩ចំនួន ៥១២ ករណី ជាប្រភេទវីរុសបំប្លែងថ្មីប្រភេទអូមីក្រុងទាំងអស់៕
